Կապույտ շրջանակներ աչքերի տակ. armeniamedicalcenter.am

Աչքերի տակ կապույտ շրջանակները վատացնում են մարդկանց արտաքին տեսքը, և դա ծանր են տանում հատկապես կանայք: Խնդիրն այն է, որ մաշկն աչքերի շուրջ շատ զգայուն է և նուրբ: Նրա արտաքին շերտի` էպիդերմիսի հաստությունն ընդամենը 0,05 մմ է, իսկ, օրինակ, այտերի մաշկինը` մինչև 0,3 մմ:

Բացի այդ, աչքերի շրջանում մաշկը զուրկ է ճարպային բջջանքից, ճարպագեղձերից, կոլլագենի քանակը նվազագույն է, իսկ էլաստինն ընդհանրապես բացակայում է:  Առանձնահատկություններից է նաև այն, որ այս շրջանում մազանոթային ցանցը խիստ մակերեսային է: Այդ պատճառով արյան շրջանառության ցանկացած խանգարում կարող է բերել մաշկի գույնի փոփոխության: Կապույտ շրջանակներն աչքերի շուրջ առաջանում են այն պատճառով, որ մուգ մազանոթային արյունը թափանցում է նուրբ մաշկի տակից, իսկ արյան մուգ գույնն առաջանում է նրա մեջ ածխաթթվի հետ միացած հեմոգլոբինի քանակի բարձրացման պատճառով:

Աչքերի շուրջ կապույտ շրջանակների առաջացման պատճառները

Դրանք բավականին շատ են, ընդ որում, կարող են լինել հիվանդությունների հետևանք, բայց նաև` նորմայի տարբերակ:

Պատճառներից են.

• ժառանգականությունը. մաշկի կառուցվածքի և գանգոսկրի անատոմիայի գենետիկ յուրահատկությունները, մազանոթային արտահայտված ցանցը, խորը ակնաճեղքերը,
• տարիքը. տարիների հետ մաշկն ավելի է բարակում և մազանոթային ցանցը դառնում է առավել նկատելի:

Ախտաբանական պատճառներ

• Երիկամների հիվանդություններ:  Երիկամների աշխատանքի խաթարման ժամանակ հեղուկն օրգանիզմից բավարար քանակով չի հեռանում և կուտակվում է միջբջջային տարածության մեջ` ճնշելով մանր անոթները, և, առաջին հերթին, դա արտահայտվում է աչքերի տակ:
• Սիրտ-անոթային հիվանդություններ: Այս ախտաբանություններին հատուկ է արյան անբավարար հարստացումը թթվածնով, նաև լյարդի աշխատանքի խանգարումը, որի դեպքում աչքերի տակ կապտությունը դեղնավուն երանգ է ունենում:
• Բրոնխաթոքային հիվանդություններ: Այս դեպքերում թթվածնի քանակն անբավարար է մուտք գործում շնչառական համակարգ և, արդյունքում, թթվածնի քանակն արյան մեջնվազում է:
• Քթի ծոցերի բորբոքումներ, սուր ռինիտ: Այս հիվանդությունների ժամանակ լինում է շրջակա հյուսվածքների այտուց, արդյունքում` երակային արյան տեղային կանգ:
• Աչքերի տակ կապույտ շրջանակներ կարող են առաջանալ նաև վահանագեղձի ախտաբանությունների, ալերգիկ ռեակցիաների, վիտամինային անբավարարություների (հատկապես A, C, K) ժամանակ:

Աչքերի կապույտ շրջանակների պատճառներ` անառողջ ապրելակերպի արդյունքում

• ֆիզիկական գերծանրաբեռնվածություն,
• նյարդային գերհոգնածություն, սթրեսներ,
• անբավարար քուն,
• թթվածնային անբավարարություն. մշտական ներկայություն` տոթ տարածքում, նստակյաց ապրելակերպ,
• վնասակար սովորություններ` ծխելը, ալկոհոլի օգտագործումը, աղի սննդի օգտագործումը, որի ժամանակ, մուգ շրջանակներից զատ, լինում է նաև այտուց,
• նիհարելու նպատակով` խիստ սննդակարգերը (աչքերի շուրջ նուրբ մաշկյը չի հասցնում հարմարվել քաշի փոփոխությանը):

Ինչպե՞ս ազատվել աչքերի շուրջ կապույտ շրջանակներից


Պետք է, նախ, պարզել դրանց առաջացման պատճառը և պայքարել դրա դեմ:

Եթե պատճառը սխալ ապրելակերպն է, խնդիրը կարգավորելը դժվար չէ. բավական է հրաժարվել ծխախոտից, ալկոհոլից, վերանայել աշխատանքի և հանգստի ռեժիմը` խուսափել գերհոգնածությունից, սթրեսային վիճակներից,  քնել 6-8 ժամ, ամեն օր զբոսնել մաքուր օդում, քնելուց առաջ չօգտագործել մեծ քանակի հեղուկներ, նվազեցնել օգտագործվող աղի քանակը:

Եթե այդ ամենը չեն օգնում, ուրեմն պետք է հետազոտվել, որպեսզի պարզվեն դրա խորքային, հիվանդագին պատճառները:

Բայց երբեմն այդ շրջանակները մաշկի առանձնահատկություն են և ոչ մի կարգավորմամբ չեն անցնում, որոնք առաջանում են արդեն մանկական տարիքում: Նման իրավիճակում կարող են օգնել հատուկ քսուկները և կոսմետոլոգիական միջամտությունները: Հաճախ կիրառում են են ֆոտոերիտասարդացումը, լազերային կամ միկրոէլեկտրաթերապիան, սարքերի օգնությամբ լիմֆոդրենաժային մերսումը:

Հարցեր, պատասխաններ, մեկնաբանություններ